BACOLOD CITY — Ginpamilit sang Department of Education Division of Bago City nga wala gindala sa Bago City Police Station ang Grade 8 student nga si Eric Hain Demafeliz agud nga ipa-blotter tuhoy sa nadula nga iPad sang iya classmate bangud siya ang ginpasibangdan nga nagkawat sini.
Sa interview sang Bombo Radyo kay Atty. Rey Cabarles, legal counsel sang Division of Bago City, nadula ang iPad sang classmate sang biktima sang Oktubre 6 kag nakit-an ini sa isa ka Facebook page nga ginabaligya kag ang account ni Demafeliz ang nag-upload sang litrato.
Nakig-angot ang tag-iya sa nagauyat sang account ni Demafeliz kag sila ang nagsugtanay nga makit-anay sa Bantayan Park alas 3:00 sa hapon sang Oktubre 9.
Suno naman kay Demafeliz, gin-hack ang iya account.
Bangud nahadlok sa iya seguridad, gin-updan sang adviser nga si Larina Peruelo ang estudyante apang naghapit ang mga ini sa police station agud maghingyo sang seguridad sa entrapment operation.
Nagboluntaryo naman si Demafeliz nga maupod sa police station agud magpa-blotter nga na-hack ang iya account.
Nagnegatibo ang entrapment operation bangud wala nag-ulhot ang subject.
Nahibaluan nga sa amo man nga adlaw, naabtan na lamang sang ginikanan ni Demafeliz nga nagabitay na sa ila balay kag wala na sang kabuhi.
Gin-athag man sang Department of Education Division of Bago City nga ginpaidalom sang adviser nga si Larina Peruelo sa counselling ang iya mga estudyante nga indi anay paghusgaran si Eric Hain Demafeliz nga siya ang nagkawat sa iPod sang iya classmate.
Ginpahayag ni Cabarles nga ginpanugyanan ni Peruelo ang mga classmates ni Demafeliz nga indi anay mag-conclude nga siya ang nagkawat sang gadget bangud wala sang ebidensya.
Sa karon, padayon nga nagareport sa trabaho si Peruelo bangud wala sang grounds for suspension batok sa iya.
Sang Oktubre 26, nagkadto sa eskwelahan ang ginikanan ni Demafeliz agud nga mabatian sang mga ini ang bahin sang eskwelahan kag sang manunudlo.
Ginpasumiter naman sila kalakip na si Peruelo sang sworn affidavit nga amo ang ipadala sa regional office sang DepEd.
Suno kay Cabarles, ang regional director na ang magadesisyon kun may grounds for suspension batok kay Peruelo.
