Naghatag sang mga pahanumdom ang Assistant Regional Director sa Department of Health – Negros Island Region (DOH-NIR) sa mga pumuluyo angot sa forecasted 41 degrees Celsius Head Index sa Negros Island Region.
Sa interview sang Bombo Radyo Bacolod kay Adrian Hort Ramos, sa mga indi gid malikawan nga ma-expose sa init, dapat nga seguruhon nga hydrated ukon magbalon gid sang tubig.
Magsuksok man sang light colored clothing kag magsuksok sang panaming sa init kaangay sang kalo kag long sleeves.
Indi man maayo nga magtinir sa congested areas ukon madamo sang tawo bangod nagasaka nagid ang kagin-ot.
Pahanumdom ni Ramos nga dapat panilagan ang posibilidad sang heat exhaustion ukon heat stroke.
Ini ang mahimo makatuga sang pagbag-o sa paghulag, mangin disoriented, magpilitla, pagkalipong, seizure, palanuka, pagtaas sang blood pressure, kag pagdasig sang pulso ukon kaangay nga ginalagas ang pangginhawa.
Suno diri, mabatyagan man ang pagtaas sang body temperature bangod nagasungaw ang init sa lawas, grabe nga pagpamalhas, kag pagmala sang panit.
Pahanumdom ni Ramos nga tanan nga age group ang apektado gikan sa bata tubtob sa tigulang.
Kun makabatyag sang paglain sang pamatyag ukon may kaupod nga nakabatyag sang mga sintomas sang heat stroke kag heat exhaustion, mas maayo magcontact sang Barangay Health Worker ukon rescue.
Ini bangod mahimo nga imbalance na ang electrolyte sa lawas, kag kinahanglan nga matatapan gilayon.
Apisar nga wala sang pili sa apektado, ang may pinakamataas nga risgo amo ang mga kabataan kag may co-morbidity.
Panugyan sini nga kun indi malikawan, limitahan lamang ang mga outdoor activities partikular na halin alas-9:00 sang aga tubtob alas-4:00 sang hapon.
