Ginalantaw nga milyones na naman ang balor sang kapin isa ka kilo sang suspected shabu nga nakumpiskar sang Regional Drug Enforcement Unit (RDEU) 6 sa buybust operation, pasado alas-2:00 sini nga kaagahon sa South Capitol Road sa atubang sang isa ka bangko nga sakop sang Brgy. 9, Bacolod City.
Ginkilala ang subject sang operasyon nga si Ronaldo Roquero, 38 anyos, residente sang Barangay Zone 7, ciudad sang Talisay.
Lakip sa nadakpan ang live-in partner ni Roquero nga si Gerline Yabut, 30, sang Purok Paghidaet, Brgy. Handumanan, ciudad sang Bacolod kag driver sang ila ginasakyan nga Innova Silver nga si Alcyn Dwight Cuadra, 40, sang Eufemia Terrace 2 Compound, Brgy. Vista Alegre, Bacolod City.
Suno sa team leader sang RDEU-Western Visayas nga si Police Lieutenant Thurslie Castillo, isa ka high value target si Roquero kag ginapahayag kag miembro sang Michael Divinagracia (Silay) Drug Syndicate nga naga-operate sa Bacolod kag iban pa nga bahin sang Negros Occidental.
Ginpahayag ni Castillo nga “moving” lang ang transaction sa ila mga agent kun sa diin wala nagapanaog sa salakyan ang mga suspek kag ila lang ginadaho ang mga items ukon iligal nga druga.
Isa ka bulto sang shabu ang gindaho sang suspek sa police poseur buyer.
Nagtinguha pa kuntani nga magpalagyo ang mga suspetsado.
Nakumpiskar sang otoridad sa sulod sang Innova ang isa ka kilo sang suspected shabu kag wala pa nahibaluan ang market value.
Gina-usisa pa man sang RDEU-6 kun diin ginakuha sang mga suspek ang ila suplay kun sa diin iya ginpahayag nga may koneksyon sila sa kanday Alyas Scott kag Allen Gamboa nga yara sa sulod sang Negros Occidental District Jail (NODJ).
Sa karun ginahulat sang RDEU-6 ang Philippine Drug Enforcement Agency (PDEA) nga amo ang magdeklarar sang market value sang suspected shabu nga narekober sa mga suspetsado.
