Nagnubo ang numero sang mga insidente sang Voilence Against Women and Children sa syudad sang Bacolod sini nga tuig, suno sa Women and Children’s Protection Desk sang Bacolod City Police Office (WCPD-BCPO).
Sa interview sang Bombo Radyo Bacolod kay Police Lieutenant Arlene Torendon, hepe sang WCPD sang BCPO, ginpahayag sini nga nagnubo sang malapit 50% ang mga insidente sang VAWC sa Bacolod sini nga tuig.
Suno kay Torendon, may yara sang 51 ka mga reported incidents sang VAWC sang tinalikdan nga tuig apang subong, suno sa ila nga record, may yara na lang sang 28 reported incidents halin January tubtob November 2019.
Nagakalipay ang hepe nga may yara sang maayo nga resulta ang ila nga pagpangabudlay kag aminado siya nga nangin posible ini sa bulig kag suporta sang mga barangay, local government units kag mga social workers.
Suno sa iya, ang padayun nga pagconduct sang mga orientation kag interviews sang WCPD-BCPO, ang mga operasyon sang mga police officers, ang pagpahibalo sa mga pumuluyo sang mga layi nga nagaprotehir sa mga babayi kag kabataan kag ang pagpahibalo sang mga penalidad kag konsekwensya sang pagbayolar sang mga layi nahanungod sa VAWC ang mga factors nga nakabulig sa pagpanubo sang nasambit nga insidente sa syudad.
Suno kay Torendon, ang mga kaso sang pagpang-abuso sa mga babayi kag kabataan nga ila ginakaptan ang sensitibo kag confidential gani nagapatigayon sila sang imbestigasyon para mavalidate kun ano ang natabo kag kun ano ang mga elemento sini.
Aminado ang hepe nga malawig ang proseso sang pagbulig sa mga biktima sang nasambit nga kaso gani nagakinahanglan sila sang bulig sang mga kapulisan kag social workers.
