Magapadala sang sulat ang Manokan Country Association kay Bacolod City Mayor Alfredo Benitez subong nga adlaw agud makig-istorya sa iya sa masunod nga semana tuhoy sa arrears sang mga stall owners.
Sa interview sang Bombo Radyo kay David Montoya, Presidente sang Manokan Country Association, nagaplano ang mga ini nga makigkita sa alkalde sa masunod nga semana agud isettle ang ila account kag madesisyunan kun sarang nga makabayad paagi sa staggered payment.
Suno kay Montoya, sa 22 ka mga stall owners, 17 lakip na siya ang nahatagan sang notice nga may yara na lamang sila sang tubtob Setyembre 30 agud masettle ang arrears kun indi sila ang magasirado.
Suno sa iya, mabug-at gid para sa ila ang kapin P600,000 kada isa ilabi na nga sang Enero lamang nagbalik sa normal ang ila mga customers bangud sa pandemic.
Sang tion ni anay Mayor Evelio Leonardia, suno diri, gin-ayo man nila nga iset aside ang utang kag hatagan mayor’s permit agud makabayad sila sa bag-o apang ini ang wala napasar sa Sangguniang Panlungsod.
Suno diri, nagbayad sila sadto sang tag P200 kada adlaw ukon P6,000 kada bulan apang sa interes lamang ini nagakadto kag wala nagabuhin sa principal nga utang.
Sa karun wala pa man sila napahibalo sang ciudad kun ano ang plano sa Manokan Country ukon tuhoy sa public–private partnership kag ang ila ginaproblemahan sa karun amu ang kun paano makabayad bangud kun madula pa ang ila mga stalls, wala na ang mga ini sang palangabuhian.
