Nagsaka ang presyo sang uga ukon ginbulad nga isda apang indi matumod sang mga manugbaligya kun bangud ini sa pagmahal sang presyo sang asin bangud wala man nagapanugid ang mga supplier.
Sa interview sang Bombo Radyo kay Marissa Condemelicor, nagabaligya sang uga sa Silay City Public Market, ang supply nga ila ginakuha ang nagikan sa ciudad sang Cadiz apang nagsaka ang presyo halin sang Agusto.
Ang tabagak nga nagabili sang P180 kada kilo sang Hunyo ang nagabili na subong sang P200.
Ang pinakas nga marot ang nagabili sang P360 kada kilo: P500 ang kilo sang pinakas nga gumaa; P50 ang 100 grams nga balingon; P200 ang kilo sang tabilus; kag P140 ang kilo sang uga nga tuloy.
Suno diri, wala sang rason nga ginhatag ang mga supplier sang nagpasaka sila sang presyo apang kalabanan diri ang diutay nga panguhaon sang isda sang mga mananagat.
Wala man nakamuno ang mga nagabulad nga nagsaka ang presyo bangud nagmahal ang asin.
Sa karon, pigaw ang baklanay kag ginalantaw nga mangin mabakal na ini sa pag-abre galing ukon sa Disyembre.
Suno kay Condemelicor, pigado ang mga tawo gani haluson ini makapaubos sang isa ka karton nga uga kada adlaw.
Sa mga binulan nga maayo ang baklanay suno sa iya, makapauli ini sang P5,000 apang sa karon, haluson ini makadala pauli sang P2,000.
