Nagaplano ang pamilya sang napatay nga commanding officer sang Regional Operational Command sang Komiteng Rehiyon – Negros kag spokesperson sang Apolinario Gatmaitan Command sa engkwentro batok sa mga militar sa Barangay Carabalan, Himamaylan City, nga ipacremate ang iya bangkay.
Sa interview sang Bombo Radyo kay Punong Barangay Gina Ellaga sang Barangay Tabao, Valladolid, nakahibalo ini nga residente sang ila lugar si Romeo V. Nanta alyas Juanito Magbanua/Juaning/Jack apang tinuig na niya ini nga wala makit-an bangud wala ini nagatinir didto.
Suno kay Ellaga, nakibot ini kahapon sang nahibaluan nga si Magbanua ang natiruhan kag napatay sa engkwentro sa Barangay Carabalan.
Suno diri, may pamilya ini kag mga kabataan nga yara nagatinir sa ila barangay.
Mabuot kag yara permi sa simbahan ang paglaragway sang punong barangay sa mga kabataan ni Magbanua.
Wala naman ini sang rekord sa barangay.
Nagalaom si Ellaga nga ang ini nga hitabo ang magserbi nga leksyon ilabi na sa mga pamatan-on nga indi makigbahin sa kaangay nga grupo kag aktibidad bangud wala gid sang maayo nga dangatan diri.
Samtang ginpahayag man sini nga may monitoring ang mga otoridad nga ginapatigayon indi lamang batok sa insurhensya kundi kasubong man sa illegal nga druga kag illegal nga mga buluhaton gani malinong ang ila lugar.
