Kadungan sa pag-umpisa sang pagluntad sang mga pagbaha dala sang bagyo PAENG, nag-umpisa naman ang pagkoordinar sang Philippine Red Cross Negros Occidental – Bacolod City Chapter sa Negros Occidental Provincial Disaster Risk Reduction and Management Council kag Bacolod City Disaster Risk Reduction and Management Office.
Suno kay Chapter Administrator Rita Benita Mirasol, nagsugod ang ila nga mga operasyon sang Oktobre 26 pa lamang sang mag-umpisa ang mga pagbaha kun sa diin sila ang naghatag sang suporta sa mga evacuees.
Ini pinaagi sa pagpalab-ot sang hot meals partikular na sa mga na-stranded nga pasahero sa evacuation center sa Barangay Taculing.
Nagbulig man ang mga ini sa pagpa-evacuate sa mga pumuluyo nga nahamtang sa mga low-lying areas.
Suno kay Mirasol, nagkoordinar sa ila kahapon ang Bacolod CDRRMO agud makahatag sang Child Friendly Space sa mga kabataan nga yara sa evacuation centers.
Kaupod man sang mga ini ang Bombo Radyo Bacolod, sa paghatag sang hot meals pinaagi sa supporter nga nagpalab-ot sang donasyon.
Magluwas sa mga pagkaon, naghatag man ang Philippine Red Cross sang Phsychological First Aid partikular na sa mga kabataan kag mga pumuluyo nga nahalitan kag natraumatize bangod sa kalamidad agud mapahagan-hagan ang ila nga nabatyag.
Samtang bangod water-related man ang kalamidad kag may posibilidad nga makalatun sang water borne diseases, nagpatigayon man ang mga ini sang hygiene promotion.
Dugang pa ni Mirasol, bangod yara gihapon ang COVID-19 pandemic, nagpanghatag man ang mga ini sang face masks sa mga pumuluyo nga yara sa evacuation centers.
Magluwas diri, sila ang nagpatigayon man sang First Aid Management sa mga may kapilasan kun sa diin nagdangat sa 77 ang ila nahatagan sang treatment.
May 159 ka mga evacuees nga nagpatigayon sang Blood Pressure monitorung sa mga volunteers.
Dugang pa ni Mirasol nga sila ang nagpatigayon man sang Disaster Preparedness Orientation kag nagtukod sang Welfare Desk kag First Aid Station.
Ang Philippine Red Cross Negros Occidental – Bacolod City Chapter ang naga-upod man sa mga coordination meetings sang nagkalainlain nga local government units (LGUs).
