Hugot ang pagbantay sang Silay City Police Station sa palibot sang ciudad kadungan sang pagsugod sang mga aktibidades angot sa Kafiestahan ni San Diego tubtub na sa highlight sa Nobyembre 13.
Sa interview sang Bombo Radyo kay Police Lt. Col. Mark Anthony Darroca, hepe sang Silay City Police Station, may mga kiosko, kalan-an kag mga peryahan na sa palibot sang Silay City Public Plaza sugod Oktubre 24.
Suno kay Darroca, may bastante nga personnel ang Silay City agud maghatag sang seguridad sa mga nagalagaw sa plaza kun sa diin handom sang police station nga wala sang may marecord nga insidente kaangay sang pagpangawat ukon snatching.
Magalibot man ang Women and Children’s Protection Desk agud manaway sa mga kabataan nga nagalibot agud mangayo-kayo.
Suno sa hepe, dal-on ang mga kabataan sa police station kag pakaunon agud indi na sila mangayo-kayo.
Duha ka semana ang aktibidades sa Silay halin Oktubre 24 tubtub Nobyembre 13.
Naghingyo man si Darroca sang augmentation nagikan sa 1st Negros Occidental Mobile Force Company kag Regional Public Safety Battalion 6 agud nga madugangan ang security preparation sang Silay City Police Station.
Ginapaabot ni Darroca ang pagdagsa sang mga tawo sa highlight sang fiesta gani mas pasanyugon pa nila ang pagbantay.
