Nagapadayon ang pagpanawagan sang apo sa tuhod ni General Juan Araneta ukon Tan Juan, nga indi pagkalipatan ang ginbuhat nga pagkabaganihan sang mga Negrense nga naghatag sang kahilwayan sa Negros Island batok sa kamot sang mga Katsila.
Aminado si Clemente del Castillo, nga amo man ang curator sa Balay Tan Juan Museum sa Bago City, nga sa mga libro, tumalagsahon lang nga mabasa ang mga pangalan sang baganihan gikan sa Negros Occidental kaangay nanday Tan Juan kag General Aniceto Lacson bangod sa masami ang mga nakasulat lamang amo ang mga baganihan sa Norte nga bahin sang Pungsod partikular na ang mga baganihan sa Luzon.
Kahapon, ginsaulog sa probinsya sang Negros Occidental ang Al Cinco de Noviembre, ang maragtason nga rebulosyon sang mga Negrense agud nga maangkon ang kahilwayan batok sa mga Espanyol.
Suno kayu Del Casillo, subong nga tuig, may mga pagbag-o sa nangin selebrasyon sa syudad sang Bago, nga amo ang hometown ni Tan Juan.
Sang-aga sila ang nagpatigayon sang pagmartsa dala ang pagpa”sigabong” sang mga kanyon kag sa hapon amo ang cultural activities.
Pahayag sini nga gintunga nila sa walo ka grupo ang mga Barangay sa syudad kag nagpatigayon sang arena competition, may kaangtanan sa reinactment sang hitabo sadto.
Nagkalainlain man ang interpretasyon, ang importante lamang suno sa apo ni San Juan, nga mangin maathag ang mensahe.
Apang paathag ni Del Castillo, nga ang Al Cinco de Noviembre ang indi lamang para sa syudad sang Bago, Silay ukon Talisay, kundi sa bilog nga probinsya sang Negros Occidental kasubong man sa Negros Oriental.
Bangod tumalagsahon lamang nga ma-mensyonar ang Al Cinco de Noviembre sa mga history books sang pungsod, gina-advocate sang mga ini nga indi makalipatan ang maragtas sang probinsya.
Dugang pa sini nga sa Disyembre, pagasaulogon man ang pagtukod sang Republika de Negros, ang makadali lang nagdugay nga administrative division sa idalum sang labing una nga republika sang Pilipinas.
Pahayag ni Del Castillo, nga ginadala man sini sa iban pa nga mga probinsya ang estorya sang Al Cinco de Noviembre agud makahibalo man ang iban nga mga Pilipino.
