Masobra 700 ka mga operators kag drivers sang Federation of Bacolod City Drivers (Febacda) Association; Sentrong Samahan ng mga Tsuper at Operators Negros (SSTONE) kag United Drivers Operators Center (UNDOC) ang nagtipon sa Bacolod City Government Center (BCGC) grounds agud nga ipahayag ang ila nga mga problema angot sa ginapatuman nga Public Utility Vehicle Modernization Program.
Ang mga operators kag drivers ang gin-atubang ni Bacolod City Vice Mayor El Cid Familliaran, Bacolod City Administrator Atty Pacifico Maghari III, Bacolod City Land Transportation Office Head Renato Novero, Bacolod Traffic Authority Office Police Major Junji Liba kag Bacolod City Police Office director Police Col. Thomas Joseph Martir agud pamatian ang luyag nga ipalab-ot sang mga drivers kag operators.
Kaina, nagsulat ang mga operators kag drivers sa syudad nga buligan sila nga mapasugtan sila nga magbiyahe samtang nagaproseso para sa renewal.
Ginpapirmahan sa mga drivers kag operators antes ginpasaka sa opisina sang bise alkalde.
Sa interview sang Bombo Radyo Bacolod kay Bacolod City Vice Mayor El Cid Familiaran, bilang human consideration, ginkasugtan sang syudad kaupod ang mga stakeholders nga magbiyahe sang duha ka semana ang mga traditional jeepneys apang dapat magpirma sang undertakings nga nagaupod ang mga ini sa kooperatiba para sa modernization.
Suno kay Familiaran, bisan ang syudad kag ang alkalde ang wala sang mahimo kundi updan ang modernization program sang gobyerno.
Suno pa diri, ang modernization program ang madayon gid kag kinahanglan updan bangud wala sang bisan sin-o mapunggan.
Samtang, ginmeeting man nila subong nga hapon ang mga modernized jeepney agud mahisayran ang ginareklamo sang mga traditional jeepneys nga may yara sang mga mabalayran kun magsulod sa kooperatiba.
Isa pa sa mga concern ang kakulang sang jeepney units nga nagabiyahe sa syudad bangud sa karun may yara lamang sang 173 ka units ang nagabiyahe.
Suno sa bise alkalde, paano ang mga pasahero sa syudad kun pauntaton ang 3000 units sang traditional jeepney sa pagbiyahe kun 173 lamang ka modernized jeepney ang nagabiyahe.
Sa ordinansa sang syudad sang Bacolod ang ginapanugutan nga magbiyahe nga modernized jeepneys ang 1, 086 units lamang.
Ginpahayag man ni Familiaran, sa tion nga masuguran na ang full implementation sang modernization program, I-evaluate sang syudad kun magadugang ukon indi sa units sang modernized jeepney.
Samtang mahimo man nga maghinun-anon liwat ang mga driver sang traditional jeepneys kun makabalik sa syudad sang Bacolod si Bacolod City Mayor Alfredo Benitez sa Lunes.
