Nakuha sang isa ka Bacolodnon ang 3rd place sa International Shooting Competition nga ginpatigayon sa Czech Republic.
Suno kay Thomas de Luzuriaga, professional gun shooter, apat sila ang nagcompete sa nasambit nga pungsod kung sa diin kaupod sini ang iya nga amay kag duha ka utod.
Sa karun, siya ang nagatinir na sa Manila kag nagapadalagan sang isa ka Art Gallery.
Paathag ni De Luzuriaga nga ang hobby ang gin-umpisahan sang ila amay kun sa diin ini ang iya na nga hilig sang highschool, nag-untat kag nagbalik sa patag sang naga-edad sang 38 anyos.
Magagmay pa lamang, ginatudluan na sila sang ila amay magkapyot sang armas, apang wala pa ginapahanugutan sa pagpalupok.
Siya ang nag-umpisa lamang magsulod sa kompetisyon sang Enero 2020 kadungan sa pandemic samtang nagdangat naman sa 10 ang mga National Competition nga napasakupan sini kun sa diin siya ang makatatlo nga nagchampion.
Aminado ini nga magastos ang nasambit nga sports bangod sa isa ka kompetisyon, ang kada player ang makagamit sang 200-300 ka bala nga nagabili P13 ang kada isa, kag magluwas diri kinahanglan pa sang trainings.
Gikan sa Bacolod City, nagatrain man ini sa Negros Sports Exchange, kag duha pa ka gun club sa Iloilo kag Muntinlupa City.
Pahayag sini nga luyag man niya nga ipromote ang nasambit nga sports gani siya ang nagtukod man sang YouTube Account nga nagtudlo natuhoy diri.
Paathag ni De Luzuriaga nga ang nagapanguna nga benepisyo sang pagsulod sa gun shooting, amo ang makabalo sa paggamit sang armas para sa personal nga proteksyon kasubong man sa pamilya.
Kun makita nga maayo ang hampang, dako man ang tyansa nga makabaton sang sponsorship gikan sa mga gun ukon ammunition companies.
Apang paathag sini nga wala sang prize money ang nasambit nga kompetisyon kundi trophy lamang kag ang makilala nga pinakasagad sa pagtiro.
Suno kay De Luzuriaga, nagdangat sa 50 ka pungsod ang nagpartisipar sa Czech Republic kag natunga sa lainlain nga division, depende sa kalibre sang armas-luthang ukon sa kadamuon sang bala nga unod sang isa ka magazine.
Sa masunod nga semana, sila ang natalana naman nga magcompete sa Thailand kag may mga nakaschedule man nga International event sa Florida, USA sa Disyembre.
Magluwas diri, may-ara naman sila sang pila ka mga nakaschedule nga National Gun Shooting event sa nagkalainlain nga bahin sang pungsod.
