Nasolbar na ang problema tuhoy sa dalan sa Barangay Felisa, Bacolod City kun sa diin may patigayunon ang ciudad nga construction kag concreting sang dalan.
Sa interview sang Bombo Radyo kay Secretary to the Mayor Atty. Joseph Chiu, ginpahayag sini nga nakaistorya na sila sa pamilya Lopez nga amu ang nagapanag-iya sang duta kun sa diin naalegrar, naplastar kag nasolbar na ang problema gani sila ang magaproceed na sa construction sang dalan.
Suno diri, ang ila point of discussion amu nga wala naathag kun diin gid ang dalan apang nasolbar na ini matapos ang paghinun-anon.
Suno sa iya, ginmarkingan na ang dalan gani wala na ini sang may nagakakit-an nga problema sa construction.
Samtang, nagaapelar kag nagapangayo naman sang pag-intindi ang secretary to the Mayor sa mga pumuluyo tuhoy sa problema sa alagyan padulong sa dumpsite rason kun ngaa may delay sa pagkolekta sang basura.
Una na nga ginpahayag ni Engineer Efraim Hechanova sang City Engineer’s Office nga ang pagkaguot sang mga dump truck sang IPM Construction and Development Corporation sa dalan padulong sa sanitary landfill sang tinalikdan nga semana ang rason sang delay sa pagkolekta sang basura apang sa karun, mahimo na nga maagyan ang dalan bangud natambakan na ini.
Suno kay Chiu, tanan nga reklamo sang mga pumuluyo tuhoy sa basura ang ginarekord kag pagahimuan sang tikang sang IPM kag ginatinguhaan man sang gobyerno nga masolbar ang problema.
Sini nga Disyembre 31, magatapos ang kontrata sang ciudad kag sang IPM Construction and Development Corporation kag suno sa iya, posible nga buksan sang city government ang bidding agud makakuha pa gid sang iban nga services nga nagapangolekta sang basura.
