Nagapanugyan ang public information officer sang Department of Education-Division of Negros Occidental nga ipabilin ang katinlo agud malikawan ang balatian nga cholera.
Sa interview sang Bombo Radyo Bacolod kay Ian Arnold Arnaez, ang mga eskwelahan sa probinsya sang Negros Occidental ang madugay na nagapractice sang sanitation kag mga precautionary measures agud makalikaw sang balatian kaangay sang cholera.
Suno kay Arnaez, ang mga bubon ukon mga water sources sang mga eskwelahan ang wala man gina-imnan bangud kalabanan nga mga tubig nga ginainom sang mga estudyante kag mga manunudlo kasubong man mga school non-teaching personnel ang ginabakal sa mga water refilling stations.
Suno diri, ang pagpakuha sang water sample nagikan sa water source ang mahal gani kalabanan sang mga dalagko lamang nga mga eskwelahan ang makasarang sa pagpatigayon bangud dako ang budget samtang mga magagmay nga eskwelahan ang wala bangud gamay lang ang budget.
Kadungan sini nagpanawagan si Arnaez sa LGUs nga kun magpatigayon sang water testing ilakip nalang ang mga eskwelahan agud masiguro man nga matinlo ang ginagamit nga tubig.
Nagpanugyan man ini sa mga ginikanan nga pabalunan sang ilimnon nga tubig nga ila mga estudyante kasubong man ipabilin nga maayo personal hygiene kasubong man sang sanitation agud malikawan ang mga balatian.
