Nagpatigayon ang Bacolod Traffic Authority Office sang clearing operations sa Lopez Jaena Street kag iban pa nga dalan sa Barangay 27 agud nga mas magmatalunsay ang dalagan sang trapiko.
Suno kay BTAO head Police Major Junji Liba, indi bag-o ang policy angot sa road clearing kundi ginpatuman sa karon bangud nagagutok na gid ang Dalan Lopez Jaena.
Suno kay Liba, aga pa ini nakig-angot sa City Legal Office agud nga makapatigayon sang joint operation kun sa diin CLO ang nagaclear sang illegal structure kag BTAO ang naga-enforce sang traffic.
Ginlimpyuhan man ang mga dalan sa palibot sang Libertad Market kun sa diin ginaclear ang mga vendors nga nagaplastar bisan diin, kasubong man ang mga trisikad, e-trike kag tricycle nga indi otorisado nga magbyahe padulong sa merkado.
Nangin cooperative naman ang mga natungdan.
Suno kay Liba, ginapaintindi nila ang nagapamilit nga madugay na sila sa lugar bangud naanad lang ang mga ini nga wala sang may nagasaway sadto.
Ginpaathag ni Liba nga indi lang Lopez Jaena Street ang ginalimpyuhan bangud may road clearing operations man sa iban nga bahin sang ciudad kag ginaamat-amat lang pasunod ang dapat nga limpyuhan.
Suno sa BTAO head, laban sa traffic matters ang dapat nga hatagan sang atensyon sa iban nga dalan samtang illegal structures naman ang nagalaksam sa dalan sa Lopez Jaena.
Nakabaton naman sang compliments ang BTAO bangud sa nasambit nga operasyon bangud dako pa ang iligwa sang dalan kun makakas ang nasambit nga structures.
