Ginpasalig sang Bacolod City Health Office nga regular ang inspection sa mga nagabaligya sang pagkaon sa ciudad.
Nahibaluan nga sang tinalikdan nga adlaw, nagviral ang video nga nagapakita nga may ulod na ang fried chicken nga balon sang Grade 4 pupil sa Montevista Elementary School.
Sa interview sang Bombo Radyo kay Jasmin Santiago, sanitation inspector sang Environmental Sanitation Division sang Bacolod City Health Office, tanan nga food handlers, food vendors kag food establishments ang ginausisa sang Sanitation Division.
Sa tion nga may makit-an nga violation suno kay Santiago, ginaisyuhan ang mga ini sang notice of violation kag ginahatagan sang bastante nga panahon agud nga magcomply antes balikan sang sanitary inspector agud lantawon ang ila nga compliance sa rekomendasyon.
Ang inspection suno kay Santiago ang nakadepende sa compliance sang establishment bangud kun sila ang compliant, quarterly lang ang inspection apang kun non-compliant, sila ang ginabalikan kada bulan.
Kun mabudlay gid ang compliance sang may violation, masami ang mga ini ginabalikan agud malantaw ang progress sang ila nga compliance.
Suno kay Santiago, naga-issue sila sang Sanitary Order kun madamo ang nakit-an nga violations agud sila ang manotify sang sahi sang violation kag yara man ang recommendation.
Subject naman for investigation ang report nga may ulod ang fried chicken nga ginbalon sang Grade 4 pupil sa Montevista Elementary School bangud wala pa sila sang impormasyon kun sa diin ginbakal ang manok.
Suno sa sanitary inspector, routine na sang Environmental Sanitation Division ang pagpatigayon sang inspection sa school canteen, ambulant vendors sa gwa sang eskwelahan kag boarding houses sa kada opening sang school year.
Sa masunod nga semana, magasugod naman ang inspection kag mass deworming sa mga food vendors.
