Ginkumpirmar sang pinuno sang 303rd Infantry Brigade sang Philippine Army nga consultant sang National Democratic Front nga si Ericson Acosta ang isa sa duha ka ginaalegar mga miyembro sang New People’s Army nga napatay sa nagluntad nga engkwentro sa tunga 94th Infantry Battalion, 47th IB sang Philippine Army kag mga rebelde sa Sitio Makilo, Barangay Camansi, Kabankalan City, Negros Occidental sang Martes.
Antes ini, una na nga nagpagwa sang statement ang National Democratic Front (NDF) Negros nga si Acosta, isa sa miyembro sang ila grupo, ang napatay sa engkwentro.
Sa interview sang Bombo Radyo kay Brigadier General Inocencio Pasaporte, ang duha ka mga nagkalamatay amu sanday Ericson Acosta alyas Raffy/Fredo, 50-anyos kag Joseph Jimenez alyas Tantan.
Suno kay Pasaporte, ang asawa ni Acosta amu si Kerima Tariman, nga napatay man sang tinalikdan nga tuig sa engkwentro batok sa mga militar sa Silay City.
Suno diri, apisar nga si Acosta ang kilala bilang isa ka poet, writer, peasant organizer kag consultant sang NDF, ang matuod-tuod sini nga trabaho amu ang top leader sang NPA sa Negros.
Siya ang first deputy secretary sang Komiteng Rehiyon – Negros, Cebu, Bohol kag Siquijor, pinuno sang Political Unified Committee kag miyembro sang Pambansang Kalihiman sa Edukasyon.
Suno sa iya, si Acosta kag Tariman ang ginpadala sang national urban agud magsupervise sa pagsabat sang problema sa financial sang New People’s Army sa Negros Island.
Samtang, suno kay Pasaporte, si Jimenez naman amu ang nagapamuno sang mga extortion activities sa ciudad sang Kabankalan.
Nagapanawagan ini sa may kilala nga yara pa sa grupo sang hublag nga engganyuhon nga magbalik sa sabak sang gobyerno kag mag-avail sang Enhanced Comprehensive Local Integration Program (E-CLIP) agud nga makaumpisa sang maayo kag malinong nga pagpangabuhi kag makaupod ang pamilya ilabi na nga nagahilapit na ang adlaw sang Paskwa.
