Ginpahayag sang anay gobernador kag energy consultant sa provincial government sang Negros Occidental nga ang Sovereign Wealth Fund (SWF) ang para lamang sa mga manggaranon nga pungsod indi sa Pilipinas nga nagapamigado.
Sa interview sang Bombo Radyo Bacolod kay Lito Coscolluela, ang Sovereign Wealth Fund (SWF) kaangay sang Maharlika Wealth Fund (MWF) ang ginapractice sang mga manggaranon nga pungsod kag ginakuha sa nagasobra nila nga mga pondo.
Suno kay Coscolluela, kun luyag gid nga maghimo sang Sovereign Wealth Fund (SWF) ang Pilipinas indi dapat pagtandugon ang pondo sang SSS kag GSIS bangud sa panahon sa karun ginakulang man ang pondo sang nasambit nga ahensya.
Suno diri indi dapat pag-isugal sang gobyerno ang kwarta sang mga empleyado sang gobyerno kag pribado nga korporasyon.
Ginpahayag man sini nga dapat mangita sang iban nga makuhaan sang pondo nga gamiton para sa ginaduso nga Maharlika Wealth Fund (MWF).
Suno kay Coscolluela, natural lamang nga magkahangawa ang mga pumuluyo ilabi na ang mga pumuluyo nga nagahatag sang monthly contribution bangud dako nga risgo ang pagsugal sang pondo sa investment fund.
Nagpanugyan man ini nga dapat tun-an anay ang ginaduso nga hagna antes aprubahan.
