Ginpasalamatan sang gobernador sa probinsya sang Negros Occidental ang mga senador nga nag-aprubar sang mga hagna nga may tinutuyo sa pagbalik sang Negros Island Region (NIR) nga magacover sa probinsya sang Negros Occidental kag Negros Oriental.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, ginpasalamatan sini si Senator Joseph Victor “JV” Ejercito, chairman sang senate committee on local government matapos gin-apruban ang hagna sa pagbalik sang NIR.
Suno kay Lacson manami ang ginpahayag ni Ejercito nga maathag nga dako ang panginahanglan sang mga tawo sa Negros Occidental kag Negros Oriental nga himuon nga isa lamang ka rehiyon ang Negros Island agud mapadasig kag mapalapit ang mga serbisyo sang national government sa duha ka probinsya.
Suno kay Lacson kun matigayon ang pagbalik sang NIR indi na maayawan ang mga pumuluyo sa duha ka probinsya sa pagtabok-tabok agud magpadulong lamang sa mga regional offices sang mga government agencies.
Ginpahayag man ni Lacson nga ang pag-aprubar ni Ejercito sang hagna ang nagahatag sang kasanag nga mahimo madayon ang NIR kag ginalauman sini nga mangin consistent ang mga senator sa pagduso sini apisar pa nga may mga nagapamatok.
