Aminado ang isa ka labor group nga dapat bantayan gihapon ang sources sang pondo para sa ginaduso nga Maharlika Wealth Fund bisan pa ginpahayag sang mga author sang hagna nga kakason na ang Government Service Insurance System kag Social Security System sa mga contributors sang budget.
Sa interview sang Bombo Radyo kay Wennie Sancho, secretay general sang General Alliance of Workers Association, tuman kadako ang utang sang Pilipinas kag madamo sang ginaatubang nga problema ang pungsod nga kinahanglan solusyunan apang ang atensyon sang gobyerno ang yara nakatuon sa Maharlika Wealth Fund.
Suno kay Sancho, wala nakig-angot ang gobyerno sa pumuluyo angot sa MWF, kun sa diin kwarta sang pumuluyo ang ila nga pagagamiton bangud ang kontribusyon sa SSS kag GSIS ang ginpangabudlayan sang mga miyembro.
Suno drii, dako ang kwarta nga ginabaton sang gobyerno nga makasarang sila maghatag sang inugpondo nga indi na mahilabtan ang kwarta sang pumuluyo.
Iya man ginpahayag nga makatuga sang gamo ang paghilabot sang gobyerno sa savings sang mga miyembro, kun sa diin ang kwarta nga ginsalig sa gobyerno ang indi ila kundi ginpangabudlayan sang mga miyembro.
Gani, iya ginakwestyon kun ano ang matuod nga motibo sang gobyerno kag kun ano nga garantiya ang mahatag nila nga kun mapierde ang negosyo, mabalik pa ang kwarta sang publiko.
Suno diri, ginbutang sa pwesto ang mga legislators para irepresentar ang katawhan nga indi lamang ang opinyon sang political party ang ila nga pamatian.
