Aminado ang pinuno sang Bacolod Traffic Authority Office (BTAO) nga may mga salakyan pa nga nagacounterflow kag nagatuyo kuntani nga maglabay sa mga dalanon nga ginadumilian labayan kadungan sang pagpatuman sang bag-o nga traffic plan kahapon.
Kahapon, nagpatuman ang syudad sang one-way scheme sa dalan Lacson, Aguinaldo kag Gatuslao.
Ang Aguinaldo street ang one way lang ang maagyan sa south padulong sa north direction kag ginapahanugutan ang diagonal parking sa east side sang dalan.
Ang Gatuslao street ang one-way man padulong sa north to south kag ginapahanugutan ang diagonal parking sa west side sang dalan.
Ang mga salakyan padulong sa east to west, nagikan sa Lacson padulong sa Aguinaldo streets, ang mahimo lang makalabay sa 12; 14; 16; 18; 22; 23; kag 25th streets kag ginapahanugutan ang diagonal parking sa north side sang nasambit nga mga dalan.
Ang mga magikan naman sa Aguinaldo padulong sa Lacson ang mahimo makaagi sa 13; 15; 17; 19; 21 kag 24th streets.
Sa interview sang Bombo Radyo Bacolod kay Police Major Junji Liba, sa una nga adlaw sang implementasyon sang one-way scheme, may mga pila pa ka mga salakyan nga imbes nga magleft turn, nagaright turn ang mga ini bangud abi nila bukas ang dalan tungod nga wala sang signages.
Suno kay Liba, ini ang kabahin man sang transition kag aminado ini nga yara pa lamang sa 20 tubtob 30 porsyento ang makit-an ang epekto sang one-way scheme.
Subong nga adlaw, plano nila nga mas pasanyugon pa gid ang pagbantay sa mga dalanon.
Suno diri, ila naman ginhimo ang tanan agud mapahibalo ang publiko tuhoy sa bag-o nga traffic plan kag mahapos man lang intindihon ang “No Entry” nga sign.
Samtang sa bahin naman sang truck-ban, ginpahayag ni Liba nga total truck ban ang halin alas 4:00 sang sa kaagahon tubtob alas-8:00 sa aga samtang ipatuman ang regulated trucks entry kun sa diin may tag-5 minutes nga interval humalin alas-8:00 sa aga tubtob alas-4:00 sa hapon kag liwat ipatuman ang total truck ban humalin alas-4:00 sa hapon tubtob alas-9:00 sa gab-i.
Hilway naman nga makasulod ang mga truck humalin alas-9:00 sa gab-i tubtob alas-4:00 sa kaagahon.
Suno diri, ila sa gihapon iregulate ang mga trucks kag may yara sa gihapon sang steady check points agud tsekyaron kun overloaded ang isa ka truck ukon may bayolasyon.
