Nagtipon ang mga Ilonggo sa London, United Kingdom sa pagsugata sang paskwa.
Suno kay Bombo International Correspondent Ramil Isogon, madamo sa ila mga nakaupod ang mga nagatrabaho bilang nurses sa pungsod nga tumandok sa Iloilo kag Guimaras.
Paathag sini nga kabahin na sa tradisyon sang mga Pilipino sa UK ang magtipon-tipon sa pagsaulog sang Paskwa kag New Year apang ini ang karun nalang liwat natigayon bangod sa duha ka tuig nga pagpanghalit sang COVID-19 pandemic.
Ang ila nga ginhanda para sa Christmas Eve ang kalabanan traditional Filipino food.
Kun indi nila mahimo nga makatipon sa Christmas Eve, ginapili sang mga Pilipino nga magtipon sa paglantaw sang fireworks sa New Year.
Suno diri sadto geese ang gina-ihaw sang mga British apang bangod sa pagdyutay sang mga nasambit nga sapat sila ang nagbaylo sa turkey nga amo sa karun ang pinakapopular nga ginahanda sa tion sang Paskwa sa UK.
Wala naman sang kan-on sa ila nga menu kundi mga patatas, parsley kag carrots lamang.
Dyutay naman ang menu sa lamesa sang mga Briton kun Paskwa indi kaangay sa Pilipinas kag sa masami ila lamang ini nga ginahiwat sa mga dalagko nga pubs suksok ang mga christmas attire.
Apisar nga nagatipon man ang tagsa ka mga British family, ang selebrasyon sang paskwa kag bag-ong tuig ang indi magahod kaangay sa Pilipinas nga bisan diin nalang may-ara sang nagapalupok kag fireworks.
Kun sa Pilipinas pag-abot sang nasambit nga mga selebrasyon nagapatigayon pa sang games kag pagkinanta, ang mga Briton ang nagatipon lamang kag ulupod nga nagakaon.
Sa pihak nga bahin isa naman sa ginabantayan sa United Kingdom amo ang Boxing Day nga ginapatigayon Desyembre 26.
Paathag ni Isogon nga sa nasambit nga adlaw dululungan nga ginapatigayon ang pagbukas sang mga regalo nga isa sa mga exciting nga adlaw sang selebrasyon.
Samtang ginpahayag naman ni Carmela Isogon, nagatrabaho sa Marketing, isa sa mga anak ni Ramil Isogon nga siya ang 20 ka tuig na sa London kun sa diin siya ang gindala sa pungsod sang naga-edad anom tubtob pito ka tuig pa lamang.
Suno diri, ginatinguhaan sang mga Ilonggo nga yara sa London nga maselebrar ang Paskwa nga kaangay sa Pilipinas kun sa diin may-ara sang pahampang kag traditional Filipino foods apang may-ara lamang sang gamay nga twist sang German tradition.
Suno naman sa manghod sini nga si Camille Isogon, 22 anyos, naga-eskwela sang medicine, nga siya ang isa ka beses pa lamang makaselebrar sang Paskwa sa Pilipinas.
Pahayag sini nga kaangay sa Pilipinas ang mga Briton ang nagatipon man para sa Christmas celebration.
Si Camille ang isa pa lamang ka tuig sang gindala sang mga ginikanan sa London.
