Liwat nga gin-atake sang pwersa sang Ukraine ang Crimean Bridge sa Russia subong nga adlaw.
Ini ang ginkumpirmar ni Moscow-installed Crimea Governor Sergei Aksyonov, kun sa diin temporaryo nga ginsuspende ang trapiko sa nasambit nga taytay.
Ini ang ikatatlo ka beses na nga pagpang-atake sang Ukraine sa Crimean Bridge sa subong nga semana.
Ang Crimean Bridge ang nagaisahanon nga tayatay nga nagakonekta sa Taman Peninsula sang Russia kag sang Crimea nga ginsakop sang pwersa sang Russia sang 2014.
Kaina sang kaagahon, una nga narecord sang Russia ang duha ka beses nga pagpang-atake sa Crimean Bridge kun sa diin narumpag ang bahin sini sa katubigan sang Kerch Strait.
Madugay na nga mainit sa mata sang Ukraine ang nasambit nga estruktura bangud sa politikal nag importansya sini sa Moscow kag bilang taktiko sa paguba sang pwersang militar sini.
Narecord man ang mga pagpang-atake kadungan sa pakigsapol ni Russian President Vladimir Putin kay US President Donald Trump kag Chinese President Xi Jinping subong nga Huwebes para sa ika-33 Asia-Pacific Economic Cooperation (APEC) Economic Leaders’ Meeting sa Shenzen, China.
Samtang, padayon naman nga nagapanaog sang air raid warnings ang Ukraine sa pila ka mga kaingod nga distrito sa gwa sang Kyiv.
Ini kasunod sa pagkapatay sang apat ka mga indibidwal matapos ang drone attack sang Russia sa ciudad sang Odessa sang Miyerkules, suno sa gobernador nga si Oleh Kiper.
Sang nagligad nga adlaw, gintarget naman sang Russia ang Dnipro River sang Kyiv nga nagtuga sang mabug-at nga trapiko kag pagkadula sa supply sang kuryente kag tubig sa rehiyon.












