Nadismaya man ang pinuno sang Bacolod Traffic Authority Office bangud sang naglabay ini sang tinalikdan nga adlaw sa bahin sang Circumferential-Helvetia Road mga ala 1:30 ang takna sa kaagahon may nakita ini nga nagbalaliskad nga mga railings nga ginabutang sa dalan agud malikawan ang left turn.
Suno kay Police Major Junji Liba, apisar nga nagaulan, personal niya ginpanaugan ang mga nagkalatumba nga railings kag may nakita pa ini nga may mga basura.
Suno diri, antes niya gintandog ang railings, nagpangusisa ini kag didto niya nahibaluan nga pila na ka oras nga nagkalatumba ang railings kag wala gid sang may nagpatindog ukon nagpahigad.
Personal naman sini nga ginpatindog kag ginkay-o ang pagplastar sang natumba nga railings bangud delikado na ini sa mga salakyan ilabi na ang nagadala sang motorsiklo, ang mapatindog pa nga railings, ginbalik apang ang iban nga wala na sang tiil ginpahigad nalang kag ginpakay-o sa BTAO personnel pagkaaga.
Ginkasubo man ni Liba ang natabo bangud sila ang nagahimo lamang sang ila trabaho agud nga mamanage ang trapiko.
Wala naman sang CCTV sa lugar agud makita kun matuod ang ginpahayag sang isa sa napamangkutan sini nga may isa ka salakyan nga ginaaligar nga nakasagaid sa railings kun sa diin ginhungod nalang nga tumbahon ang mga railings.
Nagpanugyan man si Liba nga ang mga ginapatuman nga traffic plan ang indi lang para sa personal sini nga tinutuyo kundi para man sa benepisyo sang tanan gani indi dapat pagkakason ukon tumbahon ang ginabutang nga mga railings kag signages sa dalanon sang syudad.
