Nangin maiwat ang baligyaanay sang prutas sa Bacolod City Public Plaza apisar pa nga naglabay na ang Paskwa.
Suno kay Yolanda Rico, fruit vendor sa bahin sang Gonzaga Street sa Bacolod City Public Plaza, bisan sang Paskwa tuman ka iwat ang baklanay sang mga prutas bangod sa pagmahal sa presyo.
Pahayag sini nga kalabanan sa ila gina-engganyo nga magbakal ang nagabalibad kag nagapahayag nga sa New Year nalang magabakal sang prutas.
Suno kay Rico ang kalabanan nga ginabakal amo ang tag-P10 nga mansanas kag orange.
Apang aminado ini nga ang sadto P10 nga apple ang karun P15 na ang presyo.
Samtang ang grapes nga may liso ang nagabalor sang P140 kag P240 naman ang seedless apang sa masami ang may ikasarang lamang ang nagabakal sang mga ini.
Yara sa P200 tubtob P300 ang nangin pagsaka sa kada box sang prutas subong nga holiday season.
Dugang pa sa ginalantaw sini nga rasun sa pag-iwat sang manugbakal amo ang pag-ulan ulan.
Suno diri, ang ila nga stock sang prutas ang humalin pa sang Desyembre 20, kag wala sa gihapon maubos.
Ginalantaw sini nga mahimo sa Desyembre 29 na sila liwat nga magakuha sang supply.
Apisar nga wala nagasalig, dako nga kalipayan para kay Rico kun mahimo nga maubos ang ila mga prutas sa New Year.
