Nangin matawhay ang dalagan sang trapiko sa tion sang holiday season suno sa pinuno sang Bacolod Traffic Authority Office (BTAO) apisar nga may naticketan nga naglapas sa truck ban.
Sa interview sang Bombo Radyo Bacolod kay Police Major Junji Liba, dako ang nabulig sang one way scheme nga ginpatuman sa syudad sang Bacolod agud nga maghalog ang dalagan sang trapiko.
Suno kay Liba, sa ginpatuman nga truck ban madamo naman sang naticketan nga mga drivers nga naglapas sini kun sa diin indi magnubo sa 100 na ang naticketan.
Apang ang sa one way scheme, wala pa makuha sang BTAO kun pila ang naglapas bangud malapad ang scope sini.
May yara man sang nadakpan nga naglapas sa no parking bangud madamo ang wala nagasunod sini.
Suno diri, ang bag-o nga ginapatuman nga traffic plan sa syudad sang Bacolod ang ipatuman sa sulod sangb 90 ka adlaw kag sa tion nga matapos ang gintalana nga experimental period, iassess liwat kun nakabulig gid man sa pagdumala sang dalagan sang trapiko sa syudad.
Samtang, sa pihak nga bahin, indi man maapektuhan ang mga job orders sang syudad nga ginbutang sa BTAO apisar nga ginmando na ni Bacolod City Mayor Alfredo Benitez nga 2500 lang ang JOs nagikan sa 3500 kun sa diin isa gid ka libo ang kakason sa mga ini.
