Nagapati ang convenor sang Power Watch Negros nga kun naintindihan lamang sang Board of Directors sang Central Negros Electric Cooperative (CENECO) ang kontrata sang ila ini ginpermahan, ini na kinahanglan nga ipatawag pa ang power supplier.
Sa interview sang Bombo Radyo kay Wennie Sancho, nagapabor ini sa lihok ni Bacolod City Mayor Alfredo Benetiz nga ipa-eksplikar sa Energy Regulatory Commission (ERC) kun ngaa lain-lain ang ginaapply nga rate sang electric cooperative apisar nga isa lamang ang power supply, nga amu ang Palm Concepcion Power Corporation.
Suno kay Sancho, kun naintindihan lang kuntani sang BOD kag mga miyembro sang corporate planning ang kaundan sang kontrata sa Palm Concepcion Power Corp. (PCPC) antes sila nagperma, indi na kinahanglan ipatawag ang power supply.
Suno sa iya, ini ang nagapakita lamang nga wala nila naintindihan ang nitty gritty sang kontrata.
Nagapati ini nga indi kuntani matabo ang kontrata sa PCPC kun nangin honest lamang sila sa pagnegosyar sang Unified Leyte Geothermal Power Plant kag kun ini kuntani ang ginkuha, indi na kinahanglanon ang PCPC.
Nagapanawagan man ini nga kuntani i-eksplekar sa mga konsumedor ang kaundan sang kontrata agud maintindihan sang mga ini ang source sang mataas nga presyo sang kuryente.
Nagapati ini nga ang incompetent contracting amu ang source sang pagbayad sang mataas nga presyo sang kuryente.
Suno sa iya, kinahanglan kuntani nga halungan sang BOD kag corporate planning officers ang pagforecast sang kinahanglanon sang distribution utility apang sila ang wala natrain sang National Irrigation Administration ukon ERC nga magconduct sang power supply agreement nga advantageous sa mga konsumedor.
Suhestiyon sini nga irevamp ang BOD bangud wala sila nagakabalaka sa welfare sang mga konsumedor.
