Ginkumpirmar sang provincial veterinarian sa probinsya sang Negros Occidental nga may yara sang pagsaka sa presyo sang itlog sa bulan sang Enero.
Sa interview sang Bombo Radyo Bacolod kay Dr. Placida Lemana, santo sa ila monitoring sang nagligad nga semana, ang presyo sang itlog ang nagsaka humalin pa sang una nga adlaw sang Enero subong nga tuig.
Suno kay Lemana makita sa record sang Provincial Veterinary Office, ang average nga presyo sang itlog para sa extra large ang P9.75 tubtob P10.00 samtang ang small size nga itlog ang mabakal sa P6.50 ang bilog.
Suno sa provincial veterinarian, ang pinakamataas nga gindugang sa presyo sang itlog ang nagdangat sa P0.50.
Suno diri, ang pagsaka sang presyo sang itlog ang kadungan man sang madasig nga pagsaka sang inflation ukon pagmahal sang tanan nga balaklon.
Nagpanindugan man si Lemana nga wala sang kakulang sa supply sang itlog sa probinsya sang Negros Occidental kag santo man sa report sang Department of Agriculture Regional Office 6 wala sang namonitor nga may shortage sa supply sang itlog sa rehiyon.
Nagpanugyan man ini sa mga kunsumidor nga indi na maglaum nga maganubo pa ang presyo sang itlog bangud mahal na ang mga inputs nga ginabakal kag ginagamit sang mga poultry farmers.
Nagpatigayon man sang consultative meeting ang provincial veterinary office sa mga layer operators sa probinsya kag nagpasalig man ang mga ini nga unahon ang probinsya nga mahatagan sang supply sang itlog sa tion nga may pagninit sang supply sang itlog.
