Nagdihon sang bag-o nga zonal map nga may color coding ang Department of Public Services sang syudad sang Bacolod para sa pagpangolekta sang garbage haulers sang syudad sang basura.
Sa interview sang Bombo Radyo Bacolod kay Romel Palalon, department head sang DPS, may yara sang color coding nga gintalana ang syudad sang Bacolod para sa garbage collection.
Suno kay Palalon, ang pula ang gintalana sa numbered barangays kun sa diin ginlakipan sang Barangay 1 tubtob Barangay 41 kag ang mga mainroads nga ginalakipan sang Araneta kag Lacson kun sa diin adlaw-adlaw ang pagpangolekta sang basura.
Ang paghakot sang basura ang blue zone ang nakaschedule sa Lunes kag Hwebes kag sa idalom sini ang Barangay Banago, Bata, Villamonte, Granada kag Alangilan.
Sa idalom naman sang yellow zone nga nakaschedule sa Martes kag Biyernes ini ang ginalakipan sang Barangay Estefania, Taculing kag Mansilingan samtang sa green naman nga nakaschedule sa Miyerkules kag Sabado ang pagpanghakot sang basura ang ginalakipan sang Barangay Sincang, Tangub, Pahanocoy, Punta Taytay, Sum-ag, Cabug, Alijis, Felisa kag Vista-Alegre.
Suno sa DPS head, ginasunod na sa karun sang IPM construction and development corp ang zonal map nga may color coding agud makita ang mga loopholes kag maimprove pa ini.
Natalana naman nga butangan sang Global Positioning System (GPS), agud nga makita kun ang nagakatabo sa tion nga may nabaton nga reklamo angot sa mga wala nakolekta nga mga basura kasubong man kung may yara sang wala masunod nga schedule sa pagkolekta sang basura ang garbage hauler
Suno diri sa bulig sang GPS masabat na nila ang mga reklamo kaangay lamang sang indi pagkolekta sang basura sa indi scheduled sa paghakot bangud subong ginainstindi lamang nila ang mga reklamo bangud nagkaproblema gid man ang pagkolekta sang garbage hauler kasunod sang naguba nga dalan padulong sa sanitary landfill.
Gin-athag man sini nga ang IPM ang magabutang sang GPS sa dumptrucks sini kag wala sang gastuhon ang syudad diri.
Suno kay Palalon, may ginprovide man ang syudad nga QR code agud gamiton sa pagpadangat sang reklamo nga may kaangtanan sa garbage collection.
