8,000 ka tray sang itlog nagikan sa Cebu ang na-intercept sa Bredco Port sang Domingo kag ginpangsunog.
Sa interview sang Bombo Radyo kay Dr. May Dela Torre, Bacolod City Veterinarian, ang 8,000 tray sang itlog nga nagabalor P1.4 million ang nagikan sa Bantayan, Cebu kag pagadal-on kuntani sa Iloilo apang naghapit lamang diri sa Bacolod City agud mag-ariya sang 340 trays.
Apisar nga hilway sa Avian Influenza ang Cebu, nakit-an nga expired na ang permit sang mga ini nga nagabayolar sa Joint Executive Order No. 2 sang Bacolod City kag Negros Occidental gani ginconfiscate ang itlog.
Suno kay Dela Torre, pagkatapos ginkumpiskar ang mga trays, ginpanghulog ang mga ini sa buho, ginbuka, ginsunog kag ginbutangan sang disinfectant.
Suno sa iya, posible nga magapasaka sang kaso ang City Legal Office.
Nagpanugyan naman ang city veterinarian nga likawan ang pagpasulod sang mga itlog sa ciudad kag probinsya bangud apisar nga isa ka tray lamang, posible ini nga makadala sang halit sa industriya.
Magluwas sa bird flu, nagpaandam man ini tuhoy sa iban nga strains nga makahalit sa iban nga tawo.
Ang pag-intercept ang ginpatigayon sang City Veterinary Office, Provincial Veterinary Office kag VQS-BALDA.
