Ginkwestyon sang national commander sang Task Force Kasanag kun paano nagdangat sa P16 million ang budget para sa pag-renovate sa opisina sang alkalde sang siyudad sang Bacolod.
Sa interview sang Bombo Radyo kay John Chiong, apisar nga ginpropose pa lamang kag wala pa sang approval ang pagrenovate sang Mayor’s Office, para sa iya isa na ini ka kwestyonable nga butang.
Suno diri, sa karun nga tiyempo, indi ini ang dapat nga unahon ilabi na bag-o pa lamang nga nakabangon ang tanan sa pandemic, nga madamo pa sang wala nakarekober kasubong man nga mas maayo kun unahon sini ang pagbulig sa mga pigado.
Dugang pa sini ang P16 million ang indi kaangay nga ipang renovation lang apang ini ang kaangay nga nagpatukod sang bag-o nga opisina ang gobyerno.
Gani, ginalauman sini nga makita kun insakto ang pagbutang sang dako nga expense para lang sa renovation sang opisina sang alkalde.
Kag sa karun nga na umpisahan na ang pag-rtenovate, suno kay Chiong, iya ini pagatutokan labi na nga indi mahimo nga matago ang isa ka proyekto sang gobyerno, nga kun may yara sang conspiracy, dapat nga may manabat gid diri.
Pahayag sini, posible nga nalipat ang gobyerno sa promisa sini sang nagakampanya pa lamang.
Gin-ingganyo man sini ang tagsa nga magpalapit kun may yara sang impormasyon nga mahimo mangin ebidensya sa kwestyunable nga paggasto sang local government sang P16 million para sa isa ka butang nga indi sang prayoridad.
