Hugot nga ginakondenar sang gobernador sang Negros Occidental ang pagpatay sa apat ka mga biktima sa Sitio Kangkiling, Barangay Buenavista, Himamaylan City, Negros Occidental.
Suno kay Governor Eugenio Jose Bong Lacson, ang pagpatay sa mga inosente nga mga sibilyan ang indi maayo para sa morals, values kag commitment para sa kalinong kag katawhay sang probinsya.
Suno kay Lacson, ang kaangay nga brutality nga nagaguba sang kalinong sang mga pumuluyo sa lugar ang wala sang lugar sa probinsya.
Nagpadangat man ini sang pakig-unong kag pagpangamuyo sa nalisdan nga pamilya Fausto.
Suno sa gobernador, dapat nga madakpan na kag mapriso ang mga guilty sa pagpatay sa mga inosente nga biktima agud nga mahatagan na sang hustisya ang kamatayon sang mga ini.
Nagpanawagan man ang gobernador sa mga pumuluyo sang probinsya nga updan ang pagkondenar sang brutal nga pagpatay sa mga biktima kag ipabilin ang kalinong kag katawhay sa probinsya sang Negros Occidental.
