Nagsaka sa atop ang pila ka residente sa Uso Housing sa Villa Sagrado, Barangay Burgos, Cadiz City matapos sang hinali nga pagsaka sang tubig humalin kagab-i.
Ini tuga sang tayuyon nga pag-ulan halin alas-10:00 kagab-i.
Nagsaka naman ang tubig-baha umpisa alas-11:00 kag alas-12:00 sang kaagahon nagkaran-karan na ang mga residente sa pag-evacuate.
Kalakip sa mga naka-eksperyensya sang pagbaha ang Barangay Luna, Burgos, Daga, Mabini, Andres Bonifacio kag Caduha-an.
Sa interview sang Bombo Radyo Bacolod kay Teresita Domadiego, isa sa mga evacuees gikan sa Uso Housing, siyam sila sa balay apang lima ang una na nga ginsugat sang ila himata.
Apang bangod nagsaka na ang tubig, sila nga apat nga nabilin ang ginpili na lamang nga magsaka sa atop.
Ginhulat na lamang sang mga ini nga magtulutahaw ang baha sang aga antes nagpanaog kag nagpadulong sa evacuation center.
Suno kay Domadiego, wala sila sa karun sang masuksok bangod basa ang tanan nila nga mga pagkabutang kag wala man sang bugas matapos masudlan sang tubig ang ila bugasan.
Una naman nga ginsalbar ni Fernando Espares, sang Villa Luisa, Barangay Luna, Cadiz City, ang iya ginabyahe nga tricycle sang magsaka ang tubig-baha.
Suno diri nag-awas ang tubig-baha sa highway matapos magsugat-anay ang daludo sang tubig gikan sa suba kag ang taob.
Pahayag sini nga siya ang nagakatulog na sang mamurag-muragan matapos mabati-an ang singgitan sang mga pumuluyo.
Gilayon sini nga ginsalbar ang iya tricycle kag gindala sa takas, kag siya ang nahimo pa nga makabyahe subong nga adlaw.
May naman ka mga salakyan nga nahalitan sang pagbaha kaangay sang duha ka motorsiklo nga nagsuhot sa idalom sang isa ka pickup truck matapos maanod sang mabaskog nga daludo.
May mga manok man si Espares nga nagkalamatay samtang basa man ang tanan nila nga gamit sa balay partikular na ang kutson kag mga bayo.
Pasalamatan gid sini sang dako kun may magbulig sa ila.
