Mas hugtan pa ang seguridad sa pagpatigayon sang inagurasyon sa opisyal nga pagpungko ni Republican Donald Trump bilang Presidente sa Estados Unidos sa Enero 20.
Sa interview sang Bombo Radyo Bacolod kay Noor Moraña, Bombo International News Correspondent derekta sa Houston, Texas ini kasunod sang terror attack sa New Orleans nga nagpatay sang 16 ka persona kag ang pagsigabong sang Tesla Cybertruck sa atubang sang Trump International Hotel sa Las Vegas, Nevada, USA.
Sa karun ginatumod pa kun may koneksyon ang duha ka insidente bangod natumod nga ang driver sang Cybertruck ang nagluthang sang kaugalingon sa sulod sang salakyan antes ini naglupok.
Ang suspect ang isa ka active US Army member kag yara lamang sa leave.
Nahibaluan nga ang suspect sa duha ka insidente ang dungan nga gindeploy sang 2009 sa Afghanistan, apang wala pa matumod kun sila ang may history nga magkaupod.
Suno kay Moraña, kaangay nga may mensahe man nga dala ang pagpalupok sang cybertruck bangod ang brand sang salakyan ang ginapanag-iyahan ni US billionaire Elon Musk nga makabig best friend ni Trump.
Isa sa ginatulok nga motibo sang pagtarget sa Trump amo ang tuyo nga ini ang mapunggan sa pagpungko bangod sa kahangawa sa iron hand sini nga pagpamalakad.
Lauman man ang bongga nga selebrasyon matapos ang inagurasyon kun sa diin magatambong ang pinuno sang nagkalainlain nga pungsod.
