Gin-athag ni Bacolod City Lone District Congressman Greg Gasataya, nga siya ang wala nagasapak sa mga nagapaguba sa social media, apang himuan sini sang tikang ang gina-alegar post nga pamahog sa kabuhi.
Ini kasunod sang facebook post sa page nga Bacolod Expose 2.0 ni Anonimous Participants, kun sa diin yara ang litrato ni Congressman Greg nga nakablack and white kag may petsa nga 1970-2025.
Sa interview sang Bombo Radyo Bacolod sa kongresista, nagabatun gid ini sang constructive critisizm samtang wala naman ginasapak ang mga pagpangguba sang mga trolls sa social media.
Apang sang makita sini ang nasambitan nga post, siya ang naalarma bangod para sa iya ini ang indi na political kundi makonsiderar na nga threat bangod imbulbado na ang kabuhi.
Nahibaluan nga sa masami ang pagpost sang black and white ang ginagamit sa persona nga nagtaliwan na, samtang ang petsa nga 1970-2025 ang kaangay naman nga nagapahayag nga siya ang kutob lamang sa subong nga tuig.
Suno kay Gasataya, karun lamang natabo sa pamulitika sa Bacolod nga gina-insinuate na nga patay ang kandidato.
Pahayag sini nga ini ang seryoso nga butang ilabi na nga nakita na nila nga may-ara sang pattern bangod sang tinalikdan lamang nga inadlaw, may nagpost man nga tani si Cong Greg na lang ang napatay imbes nga ang isa ka persona.
Nagapati ini nga may-ara na sang mensahe sa likod sang mga post, kag ini ang indi na makabig nga lahog-lahog lamang kag nagahatag na sang kakugmat sa iya pamilya kag mga malapit sa iya.
Suno diri, ginaproseso na sang iya abogado ang kinahanglan agud makafile sang kaso kag itap man nila ang tanan nga ahensya nga mahimo makabulig sa pagtrace sang nagpost.
Panawagan sini sa mga supporters nga indi magpanaog sa kaangay nga lebel, indi maghulag nga gwa na sa legal nga pamaagi.
