Nakakuha sang atensyon ang pahayag sang TV Host kag Box Office Star Vice Ganda nga sa nagahilapit nga midterm elections.
Ini kasunod sang mag-viral ang isa ka contestant sa “Sexy Babe” sa reality show nga wala makahibalo kon ano ang Comelec sang ini ang ginpamangkot kun ano ini sa quizz portion sang show.
Bangud sini, ginpadayon na lang sang mga hosts sang programa ang nasambit nga quiz sa pagpanguna ni Vice kun sa diin kinahanglan nga sabton sang studio audience ang mga questions natuhoy sa current events kag Philippine history.
Isa sa mga napamangkot sa studio audience kun ano sa tatlo ka branch sang gobyerno ang nagahimo sang layi.
Insakto naman ang nangin sabat sang audience nga “Legislative” gani ginpaathag ini sang TV host.
Suno kay Vice, ginabug-usan ang legislative sang Kamara kag sang Senado kag trabaho sang mga opisyal diri ang maghimo sang layi.
Gani nagpahanumdom ini sa publiko nga sa tion nga magboto, dapat pilion ang kandidato nga nakahibalo magdihon sang layi, kag may plano nga maghimo sini.
Nagpalabtik man ang komedyante sa mga pulitiko paagi sa pagpahayag nga trabaho sa Senado kag Kamara ang paghimo sang layi kag indi ang pagpanagtag sang ayuda ukon kwarta.
