Amat-amat na nga nagasanag ang imbestigasyon sa mag-live in partner nga napatay sa shooting incident nga nagluntad sang Marso 7, sa Bangga Tomaro, Brgy. Sum-ag, Bacolod City.
Ang mga biktima ang ginkilala nga sanday Carmelita Davila kag anay Punong Barangay Federico “Bimboy” Gayagas Jr. sang Barangay Bacong, Bago City.
Sa interview sang Bombo Radyo kay Police Captain Andy Ofalia, station commander sang Bacolod Police Station 9, nag-abot na ang autopsy result ni Davila kun sa diin nakita nga may walo ka igo sang bala ang iya lawas; may yara sa kamot, abaga, ilok, kag likod.
Suno diri, makit-an man nga malapit ang distansya sa pagluthang kay Davila.
Ginakabig man sa karun nga crime of passion ang nagluntad nga shooting incident.
Pahayag ni Ofalia, ginahulat pa ang pag-abot sang resulta sang bullet test, trajectory test, ballistic test kag paraffin test.
