Ginalantaw nga illegal wiretapping ukon jumper ang rason sa nagluntad nga sunog sa 25th Calamba Street, Brgy 2, Bacolod City, Negros Occidental, sang Biyernes sang gab-i.
Sa interview sang Bombo Radyo Bacolod kay Fire Officer 2 Rolin Paulan, Chief Investigator sang Bacolod City Fire Station, tatlo ka balay ang nahalitan kun sa diin isa ang totally damaged samtang duha naman ang partially damaged.
Nagdangat sa kapin sa P45,000 ang balor sang halit tuga sang nagluntad nga sunog.
Suno kay Paulan, sa imbestigasyon, apat tubtob sa anum ka balay ang naga-illegal wiretapping kag isa lang ka balay ang naka-angot sa poste.
Pahayag ni Paulan, humalin sa pag-umpisa sang fire prevention month, pito ka fire incident ang narekord kag kalabanan ang bangod sa residential fire samtang iban naman ang bangod sa grass fire.
Nagpanawagan man ini nga illegal ang jumper kag wala sang safety kag ini ang pagpangawat sa gobyerno kag pumuluyo.
