Bisan mabudlay, ginpasalig sang kapulisan sa Negros Occidental nga tumuron nila ang mga nagapalapta sang pagpamahog sa mga eskwelahan.
Sa interview sang Bombo Radyo Bacolod kay Negros Occidental Police Provincial Office Police Major Judesses Catalogo, may-ara na sila sang nasampolan nga nagpamahog sa eskwelahan sa Northern Negros Occidental.
Suno diri, paagi sa kooperasyon sang local government unit kag sa bulig sang PNP Anti-Cybercrime Group, nahimo nga makilal-an ang nagpost sang threat sa faculty sang eskwelahan.
Aminado si Catalogo nga may kabudlayan ang pagtumod sa identity sang mga nagahimo sang online threat, apang ini ang mapangitaan sang paagi nga makilal-an.
Pahanumdom sini nga may-ara sang krimen nga nakomiter ang nagapost sang online threat.
Ginapakamaayo na lamang sini nga kutob lamang sa pamahog ang nagakatabo sa Negros Occidental, apang bangod ang pamahog ang nakatuga sang disruption sa kalinong ukon pagka-untat sang klase, ginarekomendar nila sa school management nga magfile sang kaso.
