Nagsurrender na ang suspek nga nagbuno-patay sa 41 anyos nga garage utility sa Banaba Street, atubang sang Trinity School sa Villa Angela Subdivision, Brgy. Villamonte, Bacolod City sang Huwebes sang gab-i.
Ang biktima ang ginkilala nga si Rolly Magbanua, residente sang Barangay Sibucao, San Enrique, Negros Occidental.
Ang suspetsado ang ginkilala naman nga si Norberto Pagunsan, 32 anyos, single, residente sang Purok Balatong, Brgy. Elijan, Bago City, Negros Occidental.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 4, ang biktima kag ang suspect ang updanay sa pag-inum sang makahulubog nga ilimnon apang sang nakaubos na ang mga ini sang tatlo ka long neck didto na natabo ang insidente.
Suno kay Bonilla, wala man sang ginbaisan ang duha apang hinali nalang nga nagtindog ang suspek, nagsulod sa barracks kag nagkuha sang kutsilyo kag ginbalikan ang biktima nga gilayon sini nga ginbuno.
Suno sa station commander pagpangimon ang nakita nga motibo sa pagbuno sang suspek sa pakaisa sang kalive-in sini.
Ini bangud nga makapila naman ka beses nga naga-inom ang mga ini kag may bes nga ginadamhag sang biktima ang kalive-in sang suspetsado.
Gindumdom pa sang suspek nga indi man sini mapatay ang biktima apang mahimo nga may naigo ini nga vital organs nga gintunaan sang kamatayon sini.
Suno kay Bonilla, pagkatapos sang krimen nagpalagyo ang suspek sa wala mahibaluan nga direksyon apang makaligad sang pila ka oras nagsungka man ini sa Bacolod Police Station 1 kag sa karun nakahunong na sa Bacolod Police Station 4.
