Gin-athag sang punong barangay sang Barangay Mandalagan nga wala sang gahom ang barangay nga magpauntat sang ginapatindog nga cellsite apisar nga wala ini naghatag sang Resolution Of No Objection (RONO) sa nasambit nga proyekto.
Sa interview sang Bombo Radyo Bacolod kay Punong Barangay Paul Anieve, wala ini nakahatag sang RONO sa ginpatindog nga cellsite sa Purok Tonggoy, Barangay Mandalagan kag bisan gani sa cellsite nga malapit sa ila Barangay Hall.
Suno kay Anieve naconsulta na sini ang si Atty. Joseph Karol Tiu, Bacolod City Legal Officer angot sa proyekto kun bala mahimo ini mapauntat sang barangay kag ang sabat sini ang indi bangud may permit ini nagikan sa Office of the Building Official magluwas nalang kun korte na mismo ang magdesisyon nga pauntaton ini.
Samtang nagpahayag man ang City Health nga ang radiation ang yara sa babaw sang cellsite kag indi man ini direkta makaapekto sa tawo kag mas delikado pa gani ang radiation nagikan sa cellphone.
Nagpanawagan ini mga residente sang Purok Tonggoy nga wala man sini ginapabay-an ang reklamo nila kag ginatinguhaan man sini nga mahatagan sang solusyon.
