Pabor ang Punong Barangay sang Barangay Mandalagan sa pag-apruba sang Senate Bill no. 2387 ukon ang 5-year term para sa Barangay kag SK officials nga gin-propose ni Senator Chiz Escudero.
Apang, nagpabutyag man ini sang sentimyento nahanungod sa mga non-performing nga mga barangay.
Sa interview sang Bombo Radyo kay Paul Anieve, kapitan sang barangay Mandalagan, ang hagna ang may bentaha para sa mga opisyal ukon mga barangay nga naga-perform sang husto kag mahimo maglawig pa ang ila pagserbe sa komunidad.
Suno diri, ma-perform gid sang mga opisyal ang ila katungdanan kun lima ka tuig ang pagserbisyo.
Sa pihak nga bahin, ang lima ka tuig ang tuman naman kadugay para sa mga wala nagatrabaho sang insakto sa barangay kag mahimo ang pumuluyo ang maga-agwanta sang konsekwensya sini. Samtang, aminado ang Punong Brgy sang Brgy Ma-ao, Bago City nga pabor sa ila ang pag-postpone sang Brgy and Sk Election 2026.
Sa interview sang Bombo Radyo kay Punong Brgy Jovito Gahaton, pabor sa ila nga mga incumbent brgy official ang term extension agud mapatuman nila ang ila 5-years plan lakip na ang mga proyekto sa ila natungdan nga brgy.
Dugang pa ni Gahaton, makasave man sa gasto ang gobyerno kasubong man ang mga magakandidato.
Ginalantaw man sini kun siya ang magapapili sa 2028 kun madayun ang eleksyon kag ginahulat ang pinal nga desisyon sang Korte Suprema.
Sa karun, ginpahayag sang Punong Brgy. nga padayon siya sa pagtrabaho bangud madamo pa siya sang proyekto nga kinahanglan tapuson.
Ilabi na nga suno sa iya, medyo malapad ang Brgy nga iya nasakupan kun sa diin may 54 ka mga purok.
Isa sa iya proyekto nga ginatapos sa subong ang pagbutang sang mga streetlights sa highway.
Ini ang sa idalom sang Bawat Barangay Makikinabang (BBM) Program sang Office of the President.
Sa pihak sini, suno kay Gahaton, indi sa gihapon malikawon ang mga batikos sang mga pumuluyo apisar nga suno sa iya, magtrabaho man sang maayu ang isa ka brgy official.
