Nakilala na ang isa ka lalaki nga napatay matapos gina-alegar gintiro sang security guard sa isa ka Korean apartment sa dalan Lacson sa bahin sang Barangay 7, Bacolod City, sang Sabado sang kaagahon, Abril 12.
Ang biktima ang ginkilala kay Ronald Guillermo, 23 anyos, residente sang Purok Nangka, Brgy. 3, Bacolod City.
Samtang ang security guard ang ginkilala kay Rengie Librado, 40 anyos kag residente sang Sitio 3, Barangay Inolingan, banwa sang Cauayan, Negros Occidental.
Sa interview sang Bombo Radyo Bacolod kay Police Major Eugene Tolentino, Station Commander sang Bacolod Police Station 2, ginkilala mismo ang biktima sang iya nga himata kag ginpakamaayo man sang mga ini nga nakaestablisyar ang mga ini sang contact sa pamilya agud nga mahingagaw ang mga dokyumento agud nga mapasaka ang reklamo batok sa security guard nga gin-alegar nagtiro sa biktima.
Suno kay Tolentino murder ang ipasaka nga reklamo apang nakadepende pa ini sa evaluation sang prosecutor.
Ginpahayag man sang station commander nga may nakita sila nga pilas sa biktima apang wala pa makumpirmar sang SOCO kun ini ang tuga sang pagkatiro gani nagrequest sila sang autopsy nga ginahulat pa sa karun ang resulta.
Ang nakita nga pilas sang biktima ang yara sa idalom sang ilok apang indi pa matumod kun ini ang gintunaan sang iya nga kamatayon.
Dugang pa sini nga ang biktima ang wala man sang police record sa Bacolod Police Station 2.
Desidido man ang pamilya sang biktima nga mag-file sang kaso nga murder batok sa security guard.
Una na nga ginapahayag sang gwardiya nga ginatuyo sang biktima nga gub-on ang glass door sang dormitoryo.
Ini ang ginsaway sang gwardiya, apang gilayon nga nagdalagan palagyo ang biktima, gani ini ang iya gintiro.
Apisar sini, nakataklas pa sa pader ang biktima kag nakatabok sa pihak samtang si Librado ang nagtawag naman sa Bacolod Police Station 2.
