Ginareklamo sang isa ka pamilya ang nasakyan sang mga ini nga taxi bangod sa indi husto nga pamatasan sa pagcater sang pasahero.
Sa ‘Ipa Bombo Ta!’ segment sang Bombo Radyo Bacolod, ginpahayag sang tagreklamo nga si Melita Nerio, nga lima sila ang nagsakay sa Taxi upod ang iya kabataan kag apo gikan sa SM City Bacolod padulong sa 888 China Town Square.
Pahayag sini nga lain kuntani nga taxi ang ila sakyan apang sila ang gintudlo sa unahan bangod may-ara sang pila.
Apang sa panugod pa lamang nakita na nila nga kaangay nga ginamata sila sang driver.
Ginpamangkot sini kun diin magapadulong, kag gintanyag nga P100 ang ila nga iplete.
Apisar sa nagtanyag na sang presyo, gin-on man sang driver ang iya metrohan.
Apang sa ila nga byahe, tayuyon man ang pagkumod sang driver sa ila natuhoy sa malapit lamang nga destinasyon kag siya ang pierdi bangod sa traffic.
Suno kay Melita, indi na sini kuntani patulan ang driver apang wala na naka-agwanta ang iya nga bata kag nagsabat.
May tion man nga gin-akigan sini ang iya tatlo ka tuig nga apo bangod sa pagkapot sang bata sa atubang sang taxi agud maglantaw sa mga taffic lights sa gwa.
Gina-akigan ini sang taxi driver nga indi manandog bangod magkalaguba, nga aminado si Melita nga wala gilayon mahangpan sang bata bangod indi ini makahibalo mag-Ilonggo.
Nagdesisyon man ang bata sini nga isa nga ivideo ang wala untat nga kumod-kumod sang taxi driver.
Suno kay Melita, wala gid sang problema sa ila nga mangita sang iban nga masakyan kun indi luyag magcater sang driver.
Sa pagpanaog, ginhambalan pa sila nga indi maglumpat bangod siya ang wala sang inugbayad sa pagpa-ospital.
Para kay Melita, sila ang kaangay nga ginamata-mata sang driver.
Apisar nga naga-andar ang metro, kag yara lamang sa masobra P80 ang ila byahe, nagbayad ini gihapon sang P100 kaangay sa nakasugtan.
Ang driver man ang iya ginpatanyag sang isukot kag suno diri, bisan pa P200 handa man siya nga magbayad.
Panindugan sang bata sini nga indi pwede nga palampuwason na lamang ang kabastosan sang driver, agud ini ang mahatagan sang leksyon.
Matapos nila ginpost sa social media ang video, may mga komento man nga nagapahayag nga may eksperyensya naman sila nga indi maayo gikan sa nasambitan nga driver.
