Nagdeploy sang 12 ka mga fire personnel ang Cadiz City Fire Station para sa Oplan Semana Santa, Oplan Kabalaka kag Lakbay Alalay kun sa diin ang mga fire personnel ang magabulig man sa pagsiguro sang seguridad sang mga tumuluo nga nagpatigayon sang aktibidad sa Semana Santa.
Sa interview sang Bombo Radyo Bacolod kay Cadiz City Fire Marshal F/Insp. Archie Españo, ang deployment ang ila ginbutang sa Ceres Terminal sa ciudad sang Cadiz kag nagbutang man sila sang medical team nga nakahanda magresponde ingkaso nga may yara sang respondehan.
Suno kay Españo, nagdeploy man sila sang First Aid Service Team ukon FAST nga madasig nga makaresponde inkaso may magluntad nga sunog.
Magluwas sa bus terminal nagbutang man sila sang fire personnel sa plaza kun sa diin nagakuha sang blood pressure kun may magpakuha kag nagahatag man sang tubig nga mainum sa mga nagprusisyon nga wala sang tubig.
Samtang ginpahayag man sini nga matawhay man ang pagpatigayon sang mga aktibidad sa ciudad sang Cadiz nga may kaangtanan sa Semana Santa.
Ang mga beaches nga yara sa ciudad ang napangtsekyar man nila.
Ginpahayag man nga indi man madamo ang nagpadulong sa mga beach bangud sa kainit sang panahon kag ginpili nalang nga magpabilin sa ila nga mga puluy-an.
