Gindagdagan sang cease and desist order ang Binalbagan-Isabela Sugar Company Incorporated (BISCOM) kasunod sang natabo nga molasses spill sa Binalbagan river sang Abril 19.
Sa interview sang Bombo Radyo Bacolod kay Atty Wilma Lagance, Chief Legal Officer sang Environmental Management Bureau Region 6, masobra 2,000 tonnes sang molasses ang nagcontaminate sa suba gikan sa nasambitan nga sugar central.
Paathag sini nga may open pond ang sugar central kun sa diin gina-ula ang molasses, kag may ara man sang kanal nga gina-iligan sang excess water pagwa sa barangay drainage.
Apang, nag-awas sa pond ang gindischarge nga molasses kag ini ang nag-ilig sa kalog.
Ang kalog ang konektado naman sa Binalbagan river nga nagresulta sa malapad nga molasses spill.
Suno kay Lagance, pito ka adlaw lamang ang validity sang cease and desist order, kag ini ang sunod pa nga pagatun-an.
Apang paathag sini nga ang discharge sang molasses lamang ang ginpa-untat kag wala nalakip ang iban pa nga operasyon sang milling company.
Padayun man ang clean up kag containment measure, kag sa karun nagtahaw naman ang molasses sa suba.
