Ginsentensyahan sang kapin apat ka tuig nga pagkapreso ang 80 anyos nga babayi matapos sini ginhampak sang tsinelas ang kamot sang iya 18 anyos nga apo.
Si Asiye Kaytan naga-istar sa Southwestern Turkey kaupod ang iya apo nga si Vural humalin sang nagbulagay ang ginikanan sang iya apo.
Isa ka adlaw sang nagpauli halin sa trabaho si Vural, naglisenysa ini nga maggwa kaupod ang iya abyan.
Para sa seguridad sang iya apo, wala sini ginpasugtan si Vural nga maggwa kag ginlock ang piyertahan.
Nagbaisay ang duha kag ginpilit ni Vural nga buksan ang piyertahan apang nagkuha si Kaytan sang tsinelas kag ginhampak ang kamot sang iya apo.
Nagbalos naman si Vural kag gin-igo sang cellphone ang ulo sang iya lola.
Nagdugo ang ulo ni Kaytan kag dali-dali naman nga nagtawag sang ambulance si Vural.
Wala sang sin-o man sa duha ang nagfile sang complaint batok sa isa kag isa apang ginsugid nila sa responders ang natabo kag may yara sang ginfile nga report sa Denizli State Hospital nga ginpasa sa local police.
Ginapatawag ang mag-lola kag ginkwestyon apang bisan nasettle na nila nga duha ang natabo may yara sang public case nga gindihon kag nagfile sang indictment ang Public Prosecutor’s Office batok sa 80 anyos nga lola.
Sa kaso, gina-alegar nga gingamit ni Kaytan ang tsinelas bilang armas sini samtang gindepensahan lang sang 18 anyos ang iya kaugalingon sang gin-igo sini sang cellphone ang iya lola.
Gin-akusahan man ang lola sang ‘depriving a person of their liberty’ bangod ginlock sini sa sulod sang balay si Vural.
Ginsentensyahan si Kaytan sang duha ka tuig kag anum ka bulan nga pagkapreso para sa crime of ‘depriving a person of their liberty by using force, threat, or deception,’ kag duha pa gid ka tuig kag anum ka bulan sa paggamit sang armas sa iya apo.
Ang sentensya ginpanubo sa apat ka tuig kag duha ka bulan.
