Ginapanginwala sang ciudad sang Bacolod ang mga alegasyon nga ang pag-award sang ciudad sa Public Private Partnership (PPP) contract sa Highdata Infra Corporation ang may kahilabtanan sa May 12, 2025 elections.
Sa interview sang Bombo Radyo Bacolod kay Atty Caesar Distrito, spokesperson ni Bacolod City Mayor Alfredo “Albee” Benitez nga ang alegasyon kag malisyoso nga pagpalapta sang estorya ang wala sang kamatuoran.
Suno kay Distrito ang Highdata Infra Corporation ang indi imbulbado sa piniliay bangud ang SMS Global Technologies Incorporated ang joint venture partner sang COMELEC.
Suno diri ang SMS ang isa lamang sa mga tag-iya sang nasambit nga korporasyon.
Ginpaathag man sini nga sa Overseas voting ang ang obligasyon sang nasambit nga tech company gani wala sang kahilabtanan kag access sa data sang local elections.
Samtang suportado man ni Benitez ang manual voting kag tallying sa maabot nga election.
Pahayag sini nga wala sang problema kun ano ang paagi sang pag-isip sang boto mapamanual, computerized ukon electronic gani wala ini sang komento angot sa request sa COMELEC, bangud nagdaog ini sang 2022 kag nakahibalo man ini nga ang resulta sa 2025 ang insakto bangud desisyunan, tsekyaron kag ginreviewhon sang COMELEC.
Nakasaad sa layi nga duha lamang ang mga kahigayunan nga patigayunon ang manual counting kag ini ang ginalakipan sang problema sa pagtransmit sang data kag ikaduha kun may kapaslawan sa automated system.
