Ginkumpirmar sang Office of the Civil Defense nga pirmado na ni President Ferdinand “Bongbong” Marcos Jr. kag “for releasing” na lamang gikan sa Development Bank of Philippines (DBP) ang ginrequest nga dugang nga budget sang mga local government units nga apektado sang pag-alburuto sang Bullkan Kanlaon.
Sa interview kay OCD Administrator Undersecretary Ariel Nepomuceno kahapon, ginpahayag sini nga aprubado na ang ginrequest nga financial assistance sang Canlaon City Negros Oriental; kag La Castellana, La Carlota City kag Himamaylan City sa Negros Occidental.
Ang banwa sang La Castellana nga may-ara pa sang masobra dos mil nga evacuees ang may dugang nga pondo nga P48,521,100.
Ang La Carlota City nga may masobra isa ka libo nga evacuees, ang may dugang nga budget nga P63,097,000; samtang ang Canlaon City, Negros Oriental ang may dugang naman nga budget nga P29,723,350.
Ginklaro man ni Nepomuceno kun ngaa nalakip sa ginhatagan sang dugang nga budget ang Himamaylan City apisar nga ini ang wala man sang evacuees.
Ini bangod may gintukod na nga masobra 300 ka mga tents sa ginpatindog nga Tent City, kag ang dugang nga P62,539,736 budget ang gamiton sa development sang lugar kasubong man sa iban pa nga panginahanglanon sang mahamtang diri nga mga evacuees.
Aminado man ang opisyal nga deficit na katama ang budget sang mga LGUs gani manug lima ka bulan na nga ang Provincial Government ang nagapakaon sa mga evacuees.
Sa karun, focus sang gobyerno ang pag-address sang immediate concern, samtang ang long term solustion naman amo ang indi na pa-estaran ang 6km Extended Danger Zone agud indi na magsulit-sulit ang problema.
