Masobra sa 300 ka mga rice farmers ang nagpartisipar sa ginpatigayon nga Lakbay Palay sang Philippine Rice Research Institute – Negros Occidental.
Sa interview sang Bombo Radyo Bacolod kay PhilRice – Negros Occidental chapter Director Ommal Abdulkadil, bilang research institute sa rice industry, adbokasiya nila nga mapakilala sa mga mangunguma partikular na sa Visayas ang mga makabag-o nga teknolohiya sa pagpadamo sang humay, kasubong man sa preparasyon batok sa Super El Niño.
Aminado ini nga ginlimit lamang nila sa 250 tubtob 300 ang partisipante gikan sa mga rice farmers organization kag association bangod sa limitado man nga budget.
Gintalakay nila ang diversified farming kag epekto sang El Niño phenomenon sa ila pangabuhian.
Suno kay Abdulkadil, ang Bago City kag Murcia ang nakita nga mangin focus sa paghatag sang suporta.
Sila ang nagakoordinar man sa Department of Agriculture kag National Irrigation Administration – Negros Island Region.
Ginapakamaayo sang opisyal nga dako nga porsyento sang humayan sa probinsya ang irrigated, indi kaangay sa Panay Island nga 60 porsyento ang rainfed ecosystem.
Sa Panay, ang 40 porsyento nga irrigated area na lamang ang gintutukan sang bulig bangod sa mas mataas nga malauman nga produksyon, samtang ang mga lugar nga maiwat ang tubig ang ginrekomendar anay nga magshift sa iban nga crops.
Lakip sa ginpanugyan sa ila nga Lakbay Palay ang pagtanom sang utan, nga mataas ang pamakal, agud indi madulaan sang income ang mga mangunguma sa rainfed areas kag mga yara na sa punta sang irrigation system.
Panindugan sang mga ini nga indi na dapat irisgo nga magtanom bangod sang humay kun wala sang patubig bangod may stage ang humay nga nagakinahanglan sang madamo nga tubig.
Suno diri, mas masakit para sa mga mangunguma nga kun nagastos na sila sa land preparation kag pagpatubo sang humay apang mapierde lamang sa patubas.
